Kaibe boids dabei hosd, und eistoin muassd oda gar no drangen, des is na scho a a Beschäftigung. Aba es is a a Lebm a da Hüttn. De Froog natürle wiavui; Bei mia warns oiwei zwischn achte und äife.

 

A da Früah, boi no oah zum Drangen han, zersd a Wassa warma, an Drang orüahn und na sauffa lossn. Dawei konnst na scho an Stoi ausse rama. De gressan grüng na a da Früah a scho a Handä Kraftfudda, Sunst kunnd sei dass da glei ned aufstehnan wennsd ehna z früa dro bisd. Mia ham ma an da Niedaoim oiwei no an Hoizbodn. A da Houchoim scho an Betonbodn mit Gummimattn. Deah is leichta ausse z waschn. Aba da Stoi hod koa Säi ned. Weah des midm Hoizbodn ned kennd stäid se des aned via. DeAtmosphäre an Stoi mid Hoizbodn komma ned beschreibm. De Kaiwe wenn auf d Nocht einadrappen des is wia wenn d  Kinda hoamkemman.

Bois na no grengd hod und se liegn na so do und dampfen a so, ned z beschreibm.